تقليد مو أعمى... أعور بس! :)

ويسبر تكلمتلنا عن المصطلحات الي بتحكيها فروحة كذا مرة، آخر مرة كان هون  

و أنا لأني لساتني بصف رابع ب ؛ سرقت الفكرة و حبيت "أتحفكم" بشوية مصطلحات هيّوميّة.  بعض مصطلحاتها ما بنعرف من وين "أصلها"! يمكن من كثر ما بتتلخبط بين الكلام الشيشاني / العربي "لهجة أردنية ممزوجة بسعودية" / + الإنجليزي بيطلع معها هيك :]]]]

لما كانت صغيرة كانت تحكي عن المي "الماء" ======> بو وييتّا "بتشديد التاء إذا تكرمتم" :)

بسكوت = بوكوسات

لما الواحد يحكيلها عفوا ً بتحكيلو = الله يعفونك!  "نفسنا نعرف ليه!

و طبعا ً هيام في بينها و بين بعض الأحرف حالة خصام شدييييييييييييييد! ما بتلفظ حرف الخاء! بيطلعش معها لسّا :p .... بتحاول بس اللفظة بتطلع معها حاء و كذا حرف الغين .. بيطلع معها عين! :)))) و كمان الراء بيطلع معها لام :) – إشي تحشيييش! صار عمرها 4 و المفروض تلفظهم بس مخلينها على راحتها (لأ، مو خوف منها... أبدا ً!)

·       في عندها قصة لوحدة المفروض إنها مشهورة بعالم الحكايات اسمها تولين... في القصة بعض العبارات من شاكلة:

تولين لا ترغب بالنوم الآن فهيام لما تقرأها بيطلع معها = لا تلعب بالنوم "طبعا ً القراءة من الحفظ ليس إلا"

و كمان عبارة ... تحتار تولين.. أي لعبة تختار .... هيام = تحتار تولين .. أي لعبة تحتار؟

أكثر موقف محرج لما أول ما هيام صارت تنشر إبداعاتها الصوتية في هذا العالم؛ لما نطلع برة نمشي أو عحديقة مثلا ً أو هيك فطبعا ً النسوان كلهن لابسات عبايات (welcome to Saudi Arabia) :D

المهمّ ، هيام بتركضلك على وحدة أو عند عيلة ... و بأعلى صوتها .... مامااااااااااااااا باباااااااااااا شوفييييييي (لازم الخطاب بالمؤنث حتى لإلي طبعا ً...) لابسة حمار .. "إنو "خمار" .... حمار يا ماما ، زي ما إنت لابسة .. حمار! – طبعا ً أم هيام بتعمل حالها مش سامعة و أنا كثير مرات بصير "بنت ضايعة، مين مضيع هالبنت..." لووول

و هكذا انتهت الحدوتة... يلا كل واحد على شغله/شغلها .. طبخها/طبخه ... :]]]]]
--------
تكلمتلنا = تكلمت
لساتني = لا أزال
بتتلخبط = عندها صعوبة في لفظ ...
بيطلعش = لا يخرج في اللفظ
تحشيييش = مضحك
مخلينها = ندعها / نتركها
برة = الخارج